ليه فيديوهاتك لسه شكلها مش احترافي؟
بتتعلم حركات في المونتاج، بتطبق تريكات وستايلات مختلفة
ورغم كده لسه الفيديو مش جذاب واحترافى.
ومش عارف المشكلة فين؟
المشكلة دي بتواجه إيديتورز كتير دلوقتى، خصوصًا المبتدئين.
والسبب؟
السبب غالبًا إنك معملتش تكوين بصرى مظبوط.
التكوين البصرى مش موضة جديدة ولا “فزلكة”، ولا تريند عابر بين الإيديتورز.
التكوين هو حرفيًا العمود الفقري لأى فيديو واللي بيحدد نجاحه.
وأحيانًا التكوين لوحده قادر يحكي قصة كاملة… من غير كلمة ولا صوت!
طيب إيه هو التكوين البصري؟
التكوين البصري أو “الفني” ببساطة هو طريقة ترتيب العناصر في المشهد أو الصورة أو التصميم.
والترتيب ده مش مجرد توزيع للعناصر والأشكال بشكل تريندي؛ محتاج فهم: ليه رتبته كده؟ وازاي؟
ليه التكوين مهم؟
عوامل أو أساسيات التكوين هي اللي بتحدد استجابة المشاهد للفيديو بتاعك.
هي الي بتحدد طريقة رؤيته، فهمه، تأثره به وتفاعله معاه.
وكمان بتخلي الفيديو مريح للعين، يوصل الفكرة بوضوح، ويشجع المشاهد يستمر في المشاهدة.
حتى لو المشاهد نفسه مش عارف يعني إيه تكوين بصري.
إيه هي العوامل والأساسيات دي؟
• العنصر الأساسي: حدد أهم حاجة عايز المشاهد يركز عليها في الفيديو (الشخص، النص، ولا عناصر متحركة).
• التوازن: لازم توزع العناصر بشكل متوازن ومريح للعين، يساعد على الاستمرار في المشاهدة لأطول وقت ممكن.
• قاعدة الأثلاث: بتساعدك في توزيع العناصر بشكل مناسب وبيعبر عن فكرتك.
بتقسم الشاشة إلى 9 مربعات وتحط العناصر المهمة على خطوط أو نقط التقاطع.
ومكان العنصر هنا بيختلف بحسب مكونات المشهد (شخص، عناصر جرافيك، منظر طبيعي).
وبيختلف بحسب الرسالة أو الشعور اللي عايز تقدمه منه.
• التباين: إبراز الاختلاف في الألوان، والأحجام، والإضاءة
التباين هو اللي بيحدد ويوضح الصورة ويخليها مؤثرة.
* مهم هنا نركز على أهمية الإضاءة والألوان: إبراز الإضاءة، وتنسيق الألوان بشكل يخدم الفكرة.
تخيل الصورة كلها بلون واحد، مفيش ألوان أو إضاءة أو أى تفاصيل؛ ده اللى بيحصل لو مفيش تباين.
• الخلفية أو الفراغ السلبي: لازم تكون مريحة ومش مشتتة، وتكون بتخدم العناصر الأساسية.
• العمق: إنك تخلق إحساس بالعمق في الفيديو أو الصورة، عن طريق ترتيب العناصر بين المقدمة والوسط والخلفية.
• التسلسل البصري: ترتيب المشاهد أو اللقطات بشكل سلس ومريح للعين.
الخلاصة
طريقة استخدامك للأساسيات دي -حتى لو بشكل بسيط- هي اللي بتخلي شكل الفيديو يبان احترافي ومريح للعين، وبيوصل فكرته من غير تشتيت.
التكوين الناجح هو اللي بيخلي الفيديو يبان احترافي حتى لو الأدوات بسيطة.
التكوين البصري هو اللغة البصرية اللي بتترجم الصورة لكلام مؤثر، في كل فيديو اسأل نفسك: عايز تقول إيه؟
لو عايز تتعلم أكتر عن صناعة المحتوى وتطور مستواك في صناعة الفيديو؛ بنقدملك كورس “Short Video Pro” دليلك لصناعة المحتوى والفيديوهات القصيرة
تقدر تتعرف على محتوى الكورس من هنا: